Daeth tua 15 o bobl ifanc ynghyd ar gyfer cyfarfod cyntaf y Twmiaid Bach nos Sul Medi 13eg.  Dymunwn yn dda iddyn nhw yn eu tymor newydd.

 

 

 

Dyma gopi o’r cylchlythyr a anfonwyd at yr aelodau i gyd yn egluro’r trefniadau dros gyfnod atgyweirio’r capel.

Cylchlythyr Medi 2015

 

 

 

NEWYDDION MIS GORFFENNAF:

PROFEDIGAETH

Gyda thristwch mawr y clywsom y newyddion brawychus am farwolaeth annhymig Lowri Gruffydd. Estynnwn ein cydymdeimlad dwysaf i Hefin a’r bechgyn, Trystan ac Osian. Rydym yn meddwl amdanoch.

CASGLIAD Y BANC BWYD YN ARCHFARCHNAD TESCO

Llawer o ddiolch i bawb a ddaeth ynghyd i gefnogi’r Banc Bwyd drwy gasglu nwyddau yn siop Tesco ddechrau Gorffennaf. Bu tîm o 24 ohonom o’r Tabernacl yn gwneud gwahanol shifftiau o ddwy awr yr un. Byddwn yn cyhoeddi cyfanswm gwerth y casgliad yn fuan.

PENWYTHNOS PENRHYN GŴYR

Ddiwedd mis Mehefin, cafodd y Twmiaid Bach benwythnos wrth eu boddau yng nghwmni Catrin a Heulyn ym Mhenrhyn Gŵyr. Braf eu gweld wedi cael amser mor braf gyda’i gilydd, a diolch i’r trefnwyr am roi cymaint o’u hamser i gyfoethogi profiadau’r criw ifanc.

 

OEDFA GYMUN WAHANOL

Ar Sul cyntaf Gorffennaf cafwyd oedfa gofiadwy yng nghwmni plant yr Ysgol Sul, dan lywyddiaeth Heulyn Rees. Mentrodd y plant lleiaf i ffau’r llewod ar gyfer eu cyfraniad hwy drwy ganu “Ble Mae Daniel?”, a chawsom ddatganiad o “Bythol Wyrdd” gan y Twmiaid Bach. Yna, bu Heulyn yn holi Siân Knott am ei gwaith fel Prif Ffisiotherapydd Chwaraeon Cymru, a soniodd hithau am ei phrofiadau yn y Gemau Olympaidd a Chwaraeon y Gymanwlad, gan bwysleisio’r angen i gydweithio fel tîm. Gweinyddwyd y Cymun gan Emlyn Davies, gyda’r bobl ifanc yn cymuno am y tro cyntaf.

ARCHIF NEWYDDION:

YMGYRCH YR YSGOLION
Bu rhai o arweinwyr yr Ysgol Sul wrthi’n brysur yn dosbarthu cannoedd o daflenni yn yr ysgolion cynradd lleol i geisio denu rhagor o blant i’r capel. Pwy a ŵyr, efallai y gwelwn ni ragor o rieni yn dod hefyd. Dyma’r daflen ddwyieithog:

+Taflen Yr Ysgolion

BORE COFFI

Rhai o aelodau’r gynulleidfa Saesneg eu hiaith yn eu bore coffi wythnosol a drefnir ar gyfer trigolion Efail Isaf. Bydd yr elw o’r boereau hyn yn mynd i achosion da yn yr ardal.

HAMPERI NADOLIG

Diolch i bawb a gyfrannodd i greu’r hamperi Nadolig eleni eto  i bobl ifanc sy’n sefydlu cartref am y tro cyntaf yn yr ardal. Cafodd yr hamperi eu dosbarthu drwy’r Gwasanaethau Cymdeithasol ym Mhontypridd.

BANC BWYD PONTYCLUN

Bu dros ugain ohonon ni’n brysur ddiwedd Tachwedd yn helpu trefnwyr Banc Bwyd Pontyclun yn eu casgliad yn Tesco Tonysguboriau. Dyma’r ail dro i aelodau’r Tabernacl wneud hyn a’r bwriad yw helpu ym mhob casgliad o hyn allan.
Helpu achos teilwng yw’r prif reswm, wrth gwrs, ond rhaid cyfaddef hefyd ei fod yn brofiad amheuthun. Mae’n gyfle gwych i weld ochr orau pobl, mae haelioni pobl o bob cefndir yn gwneud i rywun deimlo’n wylaidd iawn, a’u hagwedd fel chwa o awyr iach mewn oes mor faterol. Mae’r rhoddion i gyd yn cael eu pwyso fel bod Tesco’n ychwanegu 30% yn ariannol at y cyfanswm. Mae cefnogaeth staff Tesco Tonysguboriau yn ddiarhebol.
Mae’n braf teimlo ein bod yn gwneud rhywbeth ymarferol sydd o les i gymaint o bobl, ond cyn swnio’n annioddegol o hunangyfiawn, mae’n bwysig ychwanegu ei fod yn brofiad sy’n eli i’r galon, ac mae pawb mor brysur, mae shift ddwyawr yn hedfan!
Byddwn yno eto ym mis Gorffennaf. Os ydych chi’n awyddus i fod yn rhan o’r profiad gwerth chweil yma, gallwch wneud hynny drwy ymateb i’r ebost fydd yn eich cyrraedd ddechrau mis Mehefin.

Tair cenhedlaeth wrth y gwaith – Lowri, Math, Glenys a Gwenno.

PRIODASAU UN RHYW

Mae disgwyl i bob eglwys Annibynnnol benderfynu a ydyn nhw o blaid neu yn erbyn cofrestru eu hadeilad ar gyfer priodasau un rhyw.  Byddwn ni’n gwneud hynny ar Ionawr 11eg, a chyhoeddwyd y ddogfen isod i ysgogi’r drafodaeth:

PRIODASAU UN RHYW

 

AR DRYWYDD WALDO

Cliciwch ynma i gael hanes y daith i Sir Benfro ar Sul y Cofio, 2013:

Ar Drywydd Waldo

PREGETH OLAF EIRIAN

Yma y cewch chi hanes pregeth olaf Eirian ym mis Rhagfyr 2013:

Pregeth Olaf Eirian

 

LLYTHYR AT Y GWLEIDYDDION

Wrth i’r Gweithgor Cyfiawnder Cymdeithasol drafod y Banc Bwyd yn eu cyfarfod cyn y Nadolig fe nodwyd gyda phryder y defnydd cynyddol a wneir o’r Banciau Bwyd ar draws y Deyrnas Gyfunol a’r cyni y mae hynny yn ei ddynodi. Cwestiynwyd pam fod angen Banc Bwyd o gwbl mewn gwlad sydd i fod i edrych ar ôl y gwannaf yn y gymdeithas trwy’r Wladwriaeth Les. Daethpwyd i’r penderfyniad y dylid datgan y pryder yn gyhoeddus ac anfon llythyr at Adran Gwaith a Phensiynau y Llywodraeth yn Llundain sydd â chyfrifoldeb dros y ddarpariaeth i’r tlawd a’r difreintiedig, gan anfon copi o’r llythyr at y Prif Weinidog David Cameron, Canghellor y Trysorlys George Osborne ynghyd â’n Haelod Seneddol Owen Smith, ein Haelod Cynulliad Mick Antoniw a Carwyn Jones, Prif Weinidog Cymru. Dyma gopi o’r llythyr a anfonwyd:

Llythyr y Gwleidyddion

Y CYNLLUN ADEILADU

O’r diwedd, ar ôl cyfnod o ddeunaw wythnos yn addoli yn Neuadd y Pentref, daeth y newydd ein bod i gael dychwelyd i’r capel ar Ionawr 24ain. Mawr oedd y cyffro a’r disgwyl i weld yr adeilad ar ei newydd wedd, a chafodd neb eu siomi: roedd pawb wedi gwirioni ar y lliwiau glanwaith, cynnes, ac roedd croeso arbennig i’r cadeiriau newydd, cyfforddus.

Croesawyd pawb yn ôl gan Wendy Reynolds, Cadeirydd y Bwrdd, a diolchodd hithau ar ein rhan ni i gyd i bawb a fu ynghlwm â’r gwaith adnewyddu, ond yn arbennig i Helen Middleton a Pens (Emlyn Penny Jones) sydd wedi ysgwyddo’r baich mwyaf o ddigon. Fel y dywedodd Wendy, buom yn hynod ffodus yn eu hymroddiad diflino dros gyfnod maith, ond roedd yn gaffaeliad mawr eu bod ill dau yn ymddiddori mewn gwaith adeiladu, ac yn medru dal eu tir i drafod yn synhwyrol a gwneud penderfyniadau anodd ar ein rhan.

Os am weld lluniau o’r gwaith adeiladu yn mynd rhagddo

Pwyswch Yma: Y Gwaith Adeiladu

Y GANOLFAN, TABERNACL, EFAIL ISAF  

Mae gennym Ganolfan aml-bwrpas ardderchog sy’n cynnwys y dechnoleg ddiweddaraf. Wyddech chi bod modd llogi’r Ganolfan ar gyfer pob math o weithgareddau?

Mae’n Ganolfan boblogaidd sy’n cynnig amgylchedd deniadol, cyfoes, am bris rhesymol ar gyfer gweithgreddau grwpiau bychain.

Beth am gysylltu â Rheolwr y Ganolfan i drafod beth allwn ni ei gynnig?  

Ann Dixey – 07505 323299

Mae’r daflen hon yn rhoi’r manylion diweddaraf am yr hyn sydd ar gael.

Medrwch lawrlwytho’r daflen i’w darllen neu ei hargraffu drwy wasgu yma:        Y Ganolfan

(Lluniwyd y daflen gan wasg Morgannwg)

 

 

LLYTHYR AT Y

GWLEIDYDDION

Wrth i’r Gweithgor Cyfiawnder Cymdeithasol drafod y Banc Bwyd yn eu cyfarfod cyn y Nadolig fe nodwyd  gyda phryder y defnydd cynyddol a wneir o’r Banciau Bwyd ar draws y Deyrnas Gyfunol a’r cyni y mae hynny yn ei ddynodi. Cwestiynwyd pam fod angen Banc Bwyd o gwbl mewn gwlad sydd i fod i edrych ar ôl y gwannaf yn y gymdeithas trwy’r Wladwriaeth Les. Daethpwyd i’r penderfyniad y dylid datgan y pryder yn gyhoeddus ac anfon llythyr at Adran Gwaith a Phensiynau y Llywodraeth yn Llundain sydd â chyfrifoldeb dros y ddarpariaeth i’r tlawd a’r difreintiedig, gan anfon copi o’r llythyr at y Prif Weinidog David Cameron, Canghellor y Trysorlys George Osborne ynghyd â’n Haelod Seneddol Owen Smith, ein Haelod Cynulliad Mick Antoniw a Carwyn Jones, Prif Weinidog Cymru. Dyma gopi o’r llythyr a anfonwyd:

Llythyr y Gwleidyddion

 

 

Fore Sul Rhagfyr 1af, a hithau’n Sul Cymun, cawsom ein hatgoffa mai dyma bregeth olaf Eirian fel gweinidog y Tabernacl. Er ein bod i gyd yn gwybod fod hynny ar ddod, ac er fod Eirian ei hun wedi ein paratoi ers blynyddoedd am hyn, roedd wynebu realiti’r sefyllfa yn brofiad chwithig iawn. Fel y dywedwyd ar derfyn yr oedfa wrth ddiolch iddo, rydym yn ffodus tu hwnt fodpregethu Eirian mor rymus ag erioed, a’i gyfraniad i fywyd yr eglwys yn dal yn ddisglair.

 

 Bydd cyfle i gydnabod ei wasanaeth hir yn fwy teilwng yn y flwyddyn newydd, ar ôl ei driniaeth, ond yn y cyfamser y cyfan fedrwn ni ei wneud yw diolch yn ddiffuant iddo am roi cymaint i bob un ohonom.

Yn ystod gwanwyn 1970 y daeth Ann ac Eirian i fyw i Efail Isaf, ac Eirian newydd ei benodi i swydd fel athro yn Ysgol Uwchradd Cantonian, Caerdydd. Cyn hynny, roedd wedi bod yn weinidog am wyth mlynedd, gan wasanaethu eglwysi yng Nghasllwchwr a Melincryddan, Castell Nedd. Yn wir, byddai’n dal i bregethu yng Nghastell Nedd ar nifer o Suliau wedi symud i’r ardal hon, gan adael Ann a’r bechgyn i fynychu’r Tabernacl ac adrodd yn ôl iddo am sut le oedd yno. A’r gwir yw mai darlun go druenus oedd hwnnw, gyda chriw bach iawn yn dod at ei gilydd i addoli, yr arian yn brin a’r iaith yn gwegian. Bu’r gynulleidfa heb weinidog ers 17 mlynedd. Doedd dim dal ym mha iaith y byddai’r oedfa ar y Sul, gan fod hynny’n dibynnu ar y pregethwr.

Ers yn agos i ddwy flynedd, roedd y Tabernacl a Bethlehem, Gwaelod-y- garth wedi bod yn chwilio am weinidog ar y cyd. Ond yn ofer.

Tabernacl oedd y gwannaf un o gapeli’r cylch ar y pryd, a’r disgwyl oedd mai ym Minny Street neu Ebeneser Caerdydd y byddai’r teulu bach newydd yn ymaelodi o ddifrif. Ond nid felly y  bu. Dechreuodd Eirian ddilyn ei wraig i’r Tabernacl pan fedrai, a manteisiodd y swyddogion yno ar ei bresenoldeb, gan ei wahodd i fod yn ddiacon, ac wedi ei adnabod yn well, gofynnwyd iddo lenwi’r pulpud yn rheolaidd. Oni bai am hynny, fyddai dim arian i dalu’r biliau, a byddai’r drysau wedi gorfod cau.

Llun Isod: Rhaglen Cyfarfod Sefydlu Eirian

 

Yn raddol, dechreuodd nifer yr aelodau gynyddu, ac ym 1973 fe sefydlwyd Eirian yn weinidog anrhydeddus. Erbyn hyn roedd yr aelodaeth wedi cyrraedd 64. Derbyniwyd 40 o aelodau newydd yn ystod y misoedd nesaf, a pharhaodd y twf hwnnw nes bod 143 ar y llyfrau erbyn 1980. Heddiw, mae’r Tabernacl yn gryfach nag erioed, gyda 180 ar  y llyfrau.

(E.D. Rhag 2013)

 

Ddydd Sul, Tachwedd 10fed, 2013, a hithau’n Sul y Cofio, trefnwyd taith undydd i fro Waldo i ymweld â rhai o’r lleoliadau pwysig yn hanes y bardd a’r heddychwr, Waldo Williams. Mentrodd tua 35 ohonom i gyd dan arweiniad Eirian Rees, a mawr oedd y cyffro o sylweddoli ein bod i gael ein cludo ym mws moethus Tîm Cymru o garej Edwards.

 

Yn groes i’r rhagolygon, roedd y tywydd yn ddymunol a’r “wybren las” yn amlwg wrth inni nesáu at y Preselau. Yr alwad gyntaf oedd Capel Blaenconin, Llandysilio, lle cafwyd sgwrs hynod ddifyr gan yr hanesydd lleol Hefin Wyn am rai o gymeriadau’r ardal. Cawsom ein tywys wedyn i weld bedd Waldo, a gwrando ar y gweinidog, y Parchg. Huw M. George, yn adrodd y stori ryfedd am gladdu Waldo mewn un bedd, ond ei goffau ar garreg fedd arall, gyfagos.

 

Clywsom hefyd am y cynlluniau cyffrous i droi’r capel yn ganolfan berfformio gymunedol, sefydlu Canolfan Waldo yn y maes parcio a throi’r festri’n ddau fwthyn. Rydym yn ddiolchgar dros ben i gyfeillion Blaenconin am eu croeso cynnes ac am rannu’r fath frwdfrydedd gyda ni.

Ymlaen â ni wedyn i gyfeiriad Crymych, a ninnau erbyn hyn wedi hen gynefino â moethusrwydd y bws, ond yn gorfod derbyn bod pris i’w dalu am y seddi lledr a’r byrddau cyfleus, gan ei fod yn rhy fawr i fynd â ni i gomin Rhos-fach at y garreg las sy’n coffau Waldo. Ond fe gafwyd sgwrs afiaethus, llawn gwybodaeth ddiddorol am yr ardal, gan Cerwyn Davies, cadeirydd Cymdeithas Waldo. Arweiniodd ni i gapel Bethel, Mynachlog-ddu, lle y cawsom y fraint o ymuno â’r gynulleidfa mewn gwasanaeth cynnes, pwrpasol, dan arweiniad y Parchg. Eirian Wyn Lewis. Ac wedi’r oedfa, rhaid oedd crwydro’r fynwent i gael cip ar fedd yr enwog Twm Carnabwth.

Capel Cana, ger Bancyfelin, oedd yr alwad nesaf, i glywed am Lyfr Gwyn Caerfyrddin gan y Parchg. Beti Wyn James – ac wedi clywed ei hanes, roedd pawb yn fwy na pharod i’w arwyddo, a’r plant yn ein plith yn hoff iawn o’r syniad o’r Llyfr Gwyn Bach. Annog heddwch yn y byd yw bwriad y Llyfr Gwyn, a bydd yn cael ei gyflwyno i’r Cynulliad maes o law. Ymhlith y rhai sydd wedi ei lofnodi y mae’r Archesgob Desmond Tutu (gweler isod) ac mae englyn grymus gan Mererid Hopwood ar y clawr allanol.

 

Roedd un lleoliad arall cyn troi tua thre, a’r Tanerdy yng Nghaerfyrddin oedd hwnnw, lle y cafwyd sgwrs felys a phryd blasus. Rydym yn ddyledus iawn i Eirian am drefnu’r cyfan, ac i’r Parchedig Aled Edwards am wasnaethu yn y Tabernacl ar gyfer y rhai hynny oedd yn methu dod ar y daith.

Mae wedi dod yn adeg cyfrannu at Gymorth Cristnogol eto eleni. Bu byddin fach o aelodau’r Tabernacl yn crwydro strydoedd y pentre’ â’u bagiau coch llachar yn casglu o ddrws i ddrws. Casglwyd dros fil o bunnoedd eleni.

Ddiwedd Ebrill gwnaeth yr eglwys yn y Tabernacl ymdrech arbennig i godi arian at Gymorth Cristnogol drwy gynnal cyngerdd yn y capel. Cafwyd eitemau bywiog gan Ysgolion Cynradd Castellau a Maesybryn. Cafwyd gwledd o gerddoriaeth gan Barti Merched Ysgol Gyfun Garth Olwg, ac Elis Widgery â’i gitâr a thair telynores ddawnus iawn, Eleri Roberts, Branwen Roberts ac Ella Iles. Ymddangosodd Côr yr Einion am y tro cyntaf i glo’r noson ac yn ôl pob ymateb roedd y perfformiad wedi plesio. Roedd yn noson lwyddiannus yn ariannol hefyd gan i ni godi naw cant a hanner o bunnoedd i goffrau Cymorth Cristnogol.

 

Y Ganolfan

Mae’r hen festri wedi cael ei ehangu ac addasu i fod yn neuadd gymunedol aml-bwrpas. Mae’n cynnwys neuadd sy’n dal hyd at 70 o bobl a lolfa gellir ei rannu’n ddwy ystafell a chegin. Mae pedwar cyfrifiadur yn y lolfa gyda chysylltiad rhyngrwyd ac mae sgriniau teledu ar gael ar gyfer cyflwyniadau.

Agorwyd y Ganolfan gan Dr Geraint Stanley Jones C.B.E. dydd Sul, 5 Medi 2010. Bu’n wythnos o ddathlu yn y capel gyda cinio yn dilyn yr agoriad ac arddangosfa arbennig o hanes y capel a’r ardal yn y Ganolfan newydd. I gloi’r dathlu cynhaliwyd Gymanfa Ganu ar brynhawn Sul 12 Medi.

Gellir gweld lluniau o’ r broses o adeiladu’r Ganolfan yma >> Adeiladu

Gellir gweld paneli’r arddangosfa yma >> Arddangosfa

Cyhoeddwyd llyfr arbennig ‘Gwres yr Efail’ yn olrhain hanes y capel a’r datblygiadau ers 1970.

 

Y Cynllun Adeiladu

Cawsom wybodaeth gyffrous am y cynllun adeiladu gan Helen Middleton ac Emlyn Penny Jones mewn cyfarfod arbennig ar brynhawn Sul yn niwedd Mehefin. Clywsom y bydd y tendr ar gyfer gwneud y gwaith yn cael ei hysbysebu’n fuan, a’r gobaith yw y bydd yr adeiladwyr yn dechrau arni yn gynnar ym mis Medi, gyda’r nod o gwblhau’r cyfan erbyn y Nadolig.

Ar hyn o bryd, rydym yn rhagweld y bydd y costau yn fwy na’r hyn sydd gennym yn y coffrau, ac felly bydd yn rhaid chwilio am grant a gofyn am fenthyciad gan Undeb yr Annibynwyr.

Hyd yn oed wedyn, fydd yr arian i gyd ddim ar gael gennym. Y bwriad felly yw troi at y gynulleidfa i ofyn am gyfraniadau arbennig, unwaith ac am byth, i’n galluogi i wneud y gwaith. Byddwch yn derbyn llythyr yn weddol fuan gyda rhagor o fanylion, yn gofyn am gyfraniad.

O gofio na fu’n rhaid i ni fel aelodau dalu am y Ganolfan, ac na wariwyd unrhyw swm sylweddol ar y capel ers tua 30 mlynedd, teimlwn yn hyderus y bydd pawb yn hael eu cefnogaeth i’r cynllun hwn.

Ar hyn o bryd, rydym wrthi’n ceisio codi arian ar gyfer cynllun adeiladu uchelgeisiol a fydd yn golygu  ail-wampio’r capel a’r festri i’w gwneud yn fwy addas i ateb y gofynion o’n safbwynt ni fel cynulleidfa a’r gymuned yn gyffredinol. Rydym yn teimlo bod yr adeiladau presennol yn llyffetheirio gwaith yr eglwys, yn ein rhwystro rhag symud gyda’r oes a rhag bod yn fwy mentrus yn ffurf  ein hoedfaon.

O safbwynt y festri, mae’r adeilad yn rhy fach erbyn hyn.  Does dim modd cynnal mwy nag un gweithgaredd yr un pryd, ac mae’r cyfleusterau yn annigonol. Yn syml, mae angen lleoliad mwy i’r Ysgol Sul ac ar gyfer Teulu Twm fel ei gilydd. Byddwn yn codi  estyniad i ganiatáu ychwanegu cegin, toiled i’r anabl ac ystafell ychwanegol at yr adeilad presennol.  Bydd un ystafell yn cynnwys meithrinfa a man chwarae gwlyb. O ganlyniad, bydd yn bosib cynnal mwy nag un gweithgaredd ar yr un pryd. Bwriedir hefyd gosod offer clyweled yno at ddibenion y capel ac unrhyw gymdeithas o’r tu allan a fydd yn defnyddio’r lle.

Bydd creu amgylchfyd mwy hylaw i ddefnyddwyr yn golygu creu mwy o amrediad i gwrdd ag anghenion  grwpiau lleol sydd eisoes yn bodoli ac i greu gweithgareddau newydd.  Ar ben hyn i gyd, bydd codi safon y cyfleusterau, gan sicrhau bodloni gofynion cyfreithiol, yn annog sefydliadau o’r tu allan i’r capel i ddefnyddio’r ddarpariaeth.   Yn y capel cyfnewidir yr eisteddleoedd sefydlog ar y llawr gwaelod am seddau unigol, symudol,  i greu awditoriwm gyda seddau i  300 a fydd yn cynnig gwell cyfforddusrwydd i’r gynulleidfa.  Gosodir cyfarpar clyweled modern a chaiff y cyntedd ei ymestyn.  Bydd y prosiect yn cynnwys gosod system wresogi effeithiol, garedig i’r amgylchedd. Bydd hefyd yn arwain at uwchraddio’r adeiladau presennol i sicrhau eu bod yn ateb gofynion personau anabl a rheoliadau iechyd a diogelwch.

Gyda golwg ar y defnydd ychwanegol a ragwelir o’r adeiladau, neilltuir tir o fewn y libart ar gyfer maes parcio gyda mynediad uniongyrchol i’r adeiladau “newydd”.  Bydd hyn yn cynnig mynediad/allanfa ddiogel i blant bach a phersonau anabl fel ei gilydd. Bydd hefyd yn lleihau’r parcio ar y stryd yn y gymdogaeth – mater sy’n peri consyrn ar y funud oherwydd y ffyrdd cul sy’n arwain at y Tabernacl.

Yn wahanol i lawer o gapeli ac eglwysi y dyddiau hyn sy’n chwilio am gyllid dim ond i gefnogicynulleidfa sy’n edwino neu i gynnal adeiladau sydd â’u harwyddocâd bellach wedi mynd yn hanesyddol, mae’r Tabernacl yn esiampl o lwyddiant – trwy gynnal cymuned sy’n addoli, trwy ddarparu ar gyfer plant a phobl ifanc,  a thrwy gefnogi gweithredoedd elusennol, cymunedol a chymdeithasol. Mae hyn yn creu galwadau na all yr adeiladau presennol eu hateb, a hynny’n llyffetheirio ein bwriadau.

Am y rhesymau hyn, byddai troi’r freuddwyd  yn ffaith yn golygu buddsoddi mewn corff sy’n meddu ar egni a gweledigaeth.  Mae’n cyflawni sawl swyddogaeth bwysig o fewn y gymuned y mae’n ei gwasanaethu; fodd bynnag, rydym yn grediniol y byddai gwireddu’r cynllun adeiladu  yn galluogi cyfoethogi’r cyfraniad mewn modd arwyddocaol ac yn rhoi cyfle i gyfrannu’n llawnach i fywyd y gymuned.

Mae croeso i unrhyw un gyfrannu at y gronfa i wireddu’r cynllun hwn: rydym yn gwerthfawrogi pob ceiniog. I wneud hynny dylech lawrlwytho’r daflen hon sy’n cynnwys ffurflen a chyfeiriad y Trysorydd.

I ddarllen ymhellach am y Cynllun Adeiladu, dylid lawrlwytho’r Prosbectws dwyieithog sy’n cael ei anfon i wahanol gyrff a mudiadau gyda’n cais am arian.

Datganiad i’r Wasg 25 Tachwedd 2009

 TROI HEN FESTRI YN GANOLFAN GYMUNEDOL

Bydd cynllun uchelgeisiol gwerth £450,000 yn dechrau yr wythnos hon i adnewyddu’r hen festri sy’n perthyn i gapel y Tabernacl, Efail Isaf, ger Pontypridd. Caiff y prosiect ei ariannu ar y cyd gan Y Loteri Genedlaethol a’r Cynulliad, a’r disgwyl yw y bydd y gwaith o ymestyn ac ail-wampio’r adeilad i’w droi’n ganolfan gymunedol yn cymryd rhyw saith mis.  Y bwriad yw addasu’r hen festri, a godwyd yn wreiddiol ddechrau’r ugeinfed ganrif, i fod yn ganolfan aml-bwrpas at ddefnydd y capel a’r gymuned yn gyffredinol. Mae gan y Tabernacl ddwy gynulleidfa, y naill yn addoli trwy gyfrwng y Gymraeg a’r llall yn cynnal oedfaon Saesneg, ond bydd yr adeilad newydd ar gael at ddefnydd cylch llawer ehangach o bobl, o fewn y pentref ei hun a’r ardal o gwmpas.  Dyfarnwyd grant o £300,000 gan Raglen Cyfleusterau a Gweithgareddau Cymunedol y Cynulliad, a £122,000 gan gronfa Pawb a’i Le, Y Loteri Genedlaethol.